يوميات قطرة ميه ..

[((مهند))]

لو تخيلنا إن قطرة ميه كتبت اليوميات بتاعتها ... يا ترى هتكتب فيها إيه ؟!

تعالو نشوف قصة حياة قطرة الميه دي ..



1- في أحد الايام المشمسة التي بلغت درجة حرارتها الاربعين , كانت هناك أحد قطرات الماء التي تسكن في احد البحار ... وقد كان الجو شديد الحرارة على هذه القطرة المسكينة التي لم تجد أي شئ يحميها من هذه الحرارة الشديدة ... لذلك إستنجدت بزميلتها التي تسكن بجوارها في هذا البحر : بقولك إيه ؟ ... معندكيش شمسية سلف , ولّا حتى كاب ....

الزميلة : ياريت يا ختي ... ده إحنا حتى من حظنا إننا ساكنين على وش البحر, وكل يوم الشمس تلسعنا ... ياما قولتلك تعالي نسكن جوه بعيد عن السطح , أعدتي تقوليلي بتخنق وبخاف من الضلمة ... إستحملي بقى يا حلوة .

القطرة الاولى : بس إنهاردة الحرارة عليت أوي... أنا مش قادرة أستحمل , أنا حاسة إن النهاردة خلاص اليوم إلي هنتبخر فيه .

القطرة الثانية وقد شعرت بقرب النهاية : يالهوي .. يعني بدل ما أحنا سايلين كده هنبقى بخار ... وبدل ما الجزيئات بتاعتي كانت ماسكة في بعضها , كل جزئ هيفك من إيد أخوه ... وأبقى ماشيه مش عارفه أتلم على جزيئاتي .

القطرة الاولى وهي تشير لأعلى : شايفه البخار إلي طالع من هناك ده ؟ ... ده طالع من بيت الجيران .

القطرة الثانية : إيه ده هما عندهم حريقة دي ولا إيه ؟

القطرة الاولى وقد على صوتها : ياريت ياختي... دي مش حريقة ... دول جيراننا بيتبخرو .. وإحنا الدور جاي علييييييينا .

لم تعقب القطرة الثانية من هول الصدمة ...ولم يكن امامها إلا الإنتظار حتى تصل درجة حراراتها إلي الدرجة التي تسمح بتبخرها... ولم يمضي سوى دقائق حتى تحولت القطرتان من الحالة السائلة إلي الحالة الغازية, وحينها كانت القطرة الاولى تصيح في زميلتها : خلى بالك يابت والجزيئات بتوعك بيبعدو عن بعض لجزئ يهرب هنا ولا هنا .... عدّي جزيئاتك كويس .

لكن لم تكن القطرة الثانية في الحالة التي تسمح لها بأن تنصت لما تقوله زميلتها , فقد كانت تعمل جاهدة على الصمود ومقاومة التحول إلي بخار , لكنها في النهاية لم تستطع التغلب على حرارة الشمس التي حولتها في النهاية إلي الحالة الغازية .

صعدت القطرتان لأعلى ... وكانت القطرة الاولى شديدة السرور بما حدث لها من تغيير في شكلها وخفة وزنها ... فالآن تستطيع أن تطير لأعلى بكل سهولة بعد ان قضت العديد من عمرها لا تستطيع الطيران ... الآن فرصتها كي تغيظ زملائها الذين ما زالو على سطح البحر .... هاهم مجموعة من زميلاتها يقفو على سطح البحر وهم ينظرون بحسد للقطرة الاولى التي تتحرك كيفما تشاء .


أبعدت القطرة الاولى نظرها عن أعين هؤلاءالحاسدين ... وأخذت تبحث عن القطرةالثانية ... وعندما وجدتها قالت في سعادة بالغة : شايفه يا بت شكلي بقى عامل إزاي؟ ... بذمتك مش شكلي كده أحلى ؟


لكن زميلتها لم تشعر بالإرتياح لهذا التغيير لذلك إكتفت بقول كلمة واحدة ردا على زميلتها : آه ...... حلو .

القطرة الاولى : مالك يا بت ... هو إنتي مش مبسوطة إننا بقينا بخار ميه ؟

القطرة الثانية : مش حكاية مش مبسوطة , أنا بس مبحبش التغيير ...وبعدين مش شايفة جزيئاتي بدل ما كانو لازقين في بعض , دلوقتي كل جزئ ماشي في حته... أنا كده مش هعرف أسيطر عليهم ...

تقطع كلامها وتنظر إلي جزيئاتها التي أخذت في الإبتعاد وتصيح فيهم : خدي يابت متلعبيش بعيد ... تعالي هنا ... إنتي يا مقصوفة الرقبة ..... آآآآآآآه ياني تعبت ....

لقطرة الاولى : مسيرك تتعودي على التغيير ده ... وبعدين مش كل التغيير وحش , التغيير مطلوب في بعض الاحيان ... وأنا عارفة إنك هتغيرى رأيك لماأقولك إحنا رايحين فين دلوقتي .

القطرة الثانية : رايحين فين ؟

القطرةالاولى : إحنا طالعين فوق عشان الهوا يشيلنا ونعمل سحابة .

يتبع

[لبنى مصر]

حوار فى البحار حوار فكاهى لذيذ اسلوبك يمتاز مهند بروح الدعابة وسطورك خفيفة الدم فانت تستطيع ان تكتب فى كل شىء بهذا الاسلوب طالما انك قولت انك لا تجيد الشعر فتكتب مثلا فى السياسه او الرياضه او فى الحياة لتجذب الناس هذه نصيحه وليس اكثر (انا عارفه ان نصايحى كترت بس مبحبش ابخل بيها استحملنى)
سلمت اناملك على هذا الطرح المتميز وننتظر مزيدك وافر تحياتى وتقديرى
تقبل مرورى
اختك لبنى

[العاشقة المجروحة]

ههههههههههههههههههه
حسستنى انى قاعدة فى حصة علوم بس كوميدية شوية تعرف يا مهند انت عندك موهبة فى الكتابة رائعة تنفع تكتب قصص قصيرة
فياريت تنميها وتاخد بالك منها كويس هاه لتهرب منك ومتعرفش تجيبها تانى ههههههههههههه زى جزيئات قطرة المياه
مودتى وتحياتى

[((مهند))]

حوار فى البحار حوار فكاهى لذيذ اسلوبك يمتاز مهند بروح الدعابة وسطورك خفيفة الدم فانت تستطيع ان تكتب فى كل شىء بهذا الاسلوب طالما انك قولت انك لا تجيد الشعر فتكتب مثلا فى السياسه او الرياضه او فى الحياة لتجذب الناس هذه نصيحه وليس اكثر (انا عارفه ان نصايحى كترت بس مبحبش ابخل بيها استحملنى)
سلمت اناملك على هذا الطرح المتميز وننتظر مزيدك وافر تحياتى وتقديرى
تقبل مرورى
اختك لبنى

شكرا يا لبنى ... وشكرا لنصايحك ..

انا فعلا بحاول بقدر الإمكان التنويع في الكتابة وكمان بحب اتطرق لمواضيع جديدة ..... وده إلي هتشوفيه في المواضيع القادمة إن شاء الله .

[((مهند))]

ههههههههههههههههههه
حسستنى انى قاعدة فى حصة علوم بس كوميدية شوية تعرف يا مهند انت عندك موهبة فى الكتابة رائعة تنفع تكتب قصص قصيرة
فياريت تنميها وتاخد بالك منها كويس هاه لتهرب منك ومتعرفش تجيبها تانى ههههههههههههه زى جزيئات قطرة المياه
مودتى وتحياتى

شكرا ليكي ..

أنا فعلا بكتب قصص على أدي كده ... ودي مش اول قصة اكتبها ... ممكن تكون اول قصة انزلها هنا في المنتدى لكن عندي قصص تانية هجيبها برضه هنا ... هو إحنا ورانا إيه غير التأليف يعني ؟

اتمنى إن باقي القصة تعجبك .

[((مهند))]

2-

القطرة الثانية : رايحين فين ؟


القطرة الاولى : إحنا طالعين فوق عشان الهوا يشيلنا ونعمل سحابة .


القطرة الثانية بلهفة : بتتكلمي بجد ؟ ... رايحين نعمل سحابة ؟


القطرة الاولى : آه والله ... حتى إسألي أي حد طالع معانا .


القطرة الثانية : يااااااه ... أنا من زمااان وجدتي كانت بتحكيلي حكايات كتيرة عن جدودها إلي راحو للسحاب ... كانت كل يوم تاخدني على حجرها وتقولي : بصي لفووق ... أبص ألاقي سحاب كتير .... فتقولي : عارفه مين ساكن هناك ؟ ... هناك ساكن جدي ابو أبويا وجدي أبو أمي ... وخالتي وجوز خالتي وعيالهم وقرايب كتير لينا ..... أنا بصراحة مكنتش بصدقها , أقول إزاي قرايبنا دول كلهم طلعو لفوق أوي كده , لكن دلوقتي عرفت إن كلامها كان حقيقي ....... إييييييه دنيا , الله يرحمك يا ستي .


وبدأت القطرة الثانية تشعر بالإرتياح بعد أن علمت أنها ذاهبة كي تكوّن أحد السحابات ... ما أجملها وهي تشارك زميلاتها في تكوين أحد السحابات ذات المنظر البديع .... الآن إستعجلت القطرة الصعود لأعلى بعد أن كانت مستاءة لهذا التغيير ... نظرت للأعلى وهي تقول لزميلتها : هو إحنا فاضلنا كتير على ما نوصل ؟


القطرة الاولى : خلاص قربنا أهو ... عارفة أنا نفسي أروح فين بعد ما نعمل سحابة ؟


القطرة الثانية : عاوزة تروحي فين ؟


القطرة الاولى : أنا نفسي بعد ما نعمل سحابة... السحابة تمشي ...وانزل مع المطرة على نهر النيل إلي في مصر .


القطرة الثانية وهي تضع يدها على صدرها بقوة : يا لهوي ... إنتي إنهبلتي يا بت ... نهر النيل , وكمان إلي في مصر .

القطرة الاولى : إيه مالك إتخضيتي كده ليه , ماله نهر النيل بتاع مصر ؟



القطرة الثانية : ده أنا جدتي كانت بتحكيلي حكايات رعب عن قرايبنا إلي كان بيسافرو هناك ... منهم واحد كان مسافر مع مراته وأولاده لنهر النيل ... هو يعيني جاله حالة سطل مزمن من البلاوي إلي كان بيشمها في النيل ... أما مراته ماتت بالبلهراسيا ... و عياله الإتنين بعد ما ابوهم وأمهم ماتو مش عارفين لغاية دلوقتي هما فين .... جدتي كانت بتحكيلي على الحاجات إلي الاخ ده شافها قبل ما يجيله حالة السطل دي ...هناك شاف كل الملوثات إلي في الدنيا .. شاف الحيوانات إلي كانت بتترمي في النيل ... تخيلي لما يكون بيتك بيطل على جثة كلب ميت ... يع .. منتهى القرف ... يعني الواحدة بدل ما تصحى الصبح تشم هوا نضيف ...تصحى تلاقي الريحة بتاعة الكلب دي .

القطرة الاولى : إسكتي .. إسكتي قلبتيلي بطني.


القطرة الثانية : عرفتي ليه بقى إتخضيت لماعرفت إنك عاوزة تروحي النيل .


القطرة الاولى ترفع يدها للسماء وتقول بتضرع : يا رب ... يارب ما توقعني في نهر النيل ده يا رب .. ده أنا ميه نضيفة ومستحملش البهدلة دي يا رب .



أخيرا وصلت القطرات للمكان الذي سيتكون فيه السحابة, صعد بخار الماء فوق الهواء الذي سيكون من الآن وسيلة تنقلهم بشكل أفقي من مكان لآخر .... وعلى الرغم من التزاحم الكبير بين القطرات وبعضها البعض للركوب في اول السحابة , إلا أن القطرة الاولى والثانية إستطاعو إختراق هذا الجمع الغفير , ونجحو في الركوب في أول السحابة .


بعد أن ركبت جميع القطرات , وإستقرت كل قطرة في مكانها ... وقفت إحدى القطرات التي يبدو من مظهرها أنها قائد هذا الجمع وقالت بصوت عالي سمعه الجميع : بصو يا جماعة , إحنا دلوقتي ركبنا السحابة دي , ودي عبارةعن الميكروباص إلي هيوصلنا المكان إلي هننزل فيه ... بس ميكروباصتنا هنا تختلف عن ميكروباصات البني آدميين .... هما بينزلو من الميكروباص يمشو على الارض عادي خالص ... أما هنا بقى هتنزلو من الميكروباص آخر الخط وهننزل منه على شكل مطره .....يعني أي حباية عندها مشاكل في القلب تقول من دلوقتي عشان النزول من فوق لتحت هيبقى خطر علي حياتها وممكن يجيلها سكتة قلبية قبل ما تنزل على المكان بتاعها .

رفعت احد الحبات يدها قائلة : طب بالنسبة للى عندهم مشاكل في الضغط , حضرتك عارفة بقى فرق الضغط بين فوق وتحت .


القائدة : لا عادي , مفيش أي مشاكل ... هوكله في الاول ممكن يلاقي مشاكل بسيطة من إختلاف الضغط لكن بعد كده هيتعود .


أخذت القائدة نظره أخيرة على الجميع لعل أحدهم يريد أن يستفسر عن شئ ما .... لكن لم يرفع أيا منهم يده .... لذلك نظرت للجميع وقالت :خلاص كده كله تمام ... يلّا على بركة الله .


يتبع ..

[العاشقة المجروحة]

يالا على بركة الله

تابع قصتك يامهند وانا متابعة معاك ان شاء الله
بس كان ليا رجاء او نصيحة ياريت تبقى تنزل قصصك فى منتدى القصص هيكون افضل
تقبل مرورى وتحياتى

[أحلى بنت ندى]

مرسى جدا القصه بجد حلوة تقبل مرورى اتمنى انك تكون قبلت ؟؟؟

[لبنى مصر]

بعد أن ركبت جميع القطرات , وإستقرت كل قطرة في مكانها ... وقفت إحدى القطرات التي يبدو من مظهرها أنها قائد هذا الجمع وقالت بصوت عالي سمعه الجميع : بصو يا جماعة , إحنا دلوقتي ركبنا السحابة دي , ودي عبارةعن الميكروباص إلي هيوصلنا المكان إلي هننزل فيه ... بس ميكروباصتنا هنا تختلف عن ميكروباصات البني آدميين .... هما بينزلو من الميكروباص يمشو على الارض عادي خالص ... أما هنا بقى هتنزلو من الميكروباص آخر الخط وهننزل منه على شكل مطره .....يعني أي حباية عندها مشاكل في القلب تقول من دلوقتي عشان النزول من فوق لتحت هيبقى خطر علي حياتها وممكن يجيلها سكتة قلبية قبل ما تنزل على المكان بتاعها .

رفعت احد الحبات يدها قائلة : طب بالنسبة للى عندهم مشاكل في الضغط , حضرتك عارفة بقى فرق الضغط بين فوق وتحت .


القائدة : لا عادي , مفيش أي مشاكل ... هوكله في الاول ممكن يلاقي مشاكل بسيطة من إختلاف الضغط لكن بعد كده هيتعود .


أخذت القائدة نظره أخيرة على الجميع لعل أحدهم يريد أن يستفسر عن شئ ما .... لكن لم يرفع أيا منهم يده .... لذلك نظرت للجميع وقالت :خلاص كده كله تمام ... يلّا على بركة الله .


دى احلى حته ضحكتنى قصه جميله فكاهيه محدش قبل كده كتب فيها انت عندك موهبة الكتابة بخفة دم او سخريه يارب تعرف توظفها صح بس لازم فى الحكومه ع الاقل وظيفه ثابته بس زى ما قلتلك اختى العاشقه المجروحه القصص هيكون مكانها افضل فى قسم القصص فى الركن الادبى وننتظر مزيدك
تقبل مرورى
اختك لبنى

[((مهند))]

يالا على بركة الله

تابع قصتك يامهند وانا متابعة معاك ان شاء الله
بس كان ليا رجاء او نصيحة ياريت تبقى تنزل قصصك فى منتدى القصص هيكون افضل
تقبل مرورى وتحياتى

إن شاء الله المرة الجاية ....
خليكي متابعة .

مرسى جدا القصه بجد حلوة تقبل مرورى اتمنى انك تكون قبلت ؟؟؟

شكرا يا ندى ... وخلاص قبلت مرورك ... اي خدمة .